احساس ایمرجنسی کیش پروگرام کمزور طبقے دی فلاح تے بہبود سانگے وݙے پیمانےتے تعاون کریندا پئے

اسلام آباد۔11نومبر (اے پی پی)عالمی سطح تے شہرت یافتہ احساس ایمرجنسی کیش پروگرام پاکستان دی تریخ اچ ٻہوں وݙا سماجی تحفظ دا ذریعہ بݨ تے سامݨے آئے۔ کورونا وائرس دی وباپاروں لاک ڈائون دے غیر معمولی حالات اچ احساس پروگرام معاشرے دے کمزور طبقے کوں بااختیار بݨائے۔ وزیراعظم عمران خان ملک اچ کورونا وائرس دی وبا پاروں لاک ڈائون سانگے کمزور طبقات کوں آوݨ آلی معاشی اوکھ کوں سمجھدن اتے مستحق اتے مہینہ وار اجرت تے کم کرݨ آلے ورکراں کوں پہلی اپریل 2020ءکوں نقد مالی امداد ݙیوݨ کیتے اے پروگرام شروع کیتا۔ ایں پروگرام دے تحت ہݨ تئیں ڈیڈھ کروڑ مستحق ٹٻراں اچ 180 ارب روپے دی رقم تقسیم کیتی گئی اے اتے ادائیگی دا عمل انہاں لوکاں کیتے ہݨ وی چلدا پئے جیڑھے جو بائیو میٹرک دے مسئلے یا مستحقین دی اموات پاروں اے امداد نی ڳھن سڳے۔ ملک اچ افرادی قوت دے جائزہ نال اے ڳالھ سامݨے آئی اے جو ملک اچ 24 ملین ایجھے لوک ہن جیڑھے جو ݙیہاڑی تے یا ٹھیکہ داری نظام دے تحت کم کریندن یا ملک دی غیر رسمی معیشت اچ اپݨے کاروبار نال جڑین۔ جئیں ویلھے ایں تعداد کوں ٹٻر دے سائز دے نال گݨیا گئے تاں ملک اچ اینجھے لوکاں دی تعداد 160 ملین تھی گئی جوکُل آبادی دا ݙو تہائی حصہ ہن۔ لاک ڈائون وچال بری طرح متاثر تھیوݨ آلے مزدوراں اتے ݙیہاڑی تے کم کرݨ آلے لوکاں کوں 8171 تے ایس ایم ایس کرݨ دا آکھیا گئیا ہئی جیندے بعد 139 ملین ایس ایم ایس موصول تھئے۔ درخواست ݙیوݨ آلیں دی تفصیلات دی مختلف پیرا میٹرز نال پڑتال کیتی گئی تانجو مستحق لوکاں کوں شفاف طریقے نال چݨیا ونڄ سڳے۔ ادائیگی دا عمل نامزد بینکاں اتے ریٹیل آئوٹ لیٹس دے ذریعے شروع کیتا گئے جیندے اچ ایس او پیز دی تعمیل کوں یقینی بݨایا گیا ہئی اتے سائبر حملیاں، بائیو میٹرک دے مسائل، غیر رجسٹرڈ اموات، بینکاں اتے متعلقہ اداریاں دی بندش دے چیلنج وی سامݨے آئن۔ یونیسف ، اقوام متحدہ اتے IPC-IG موجب ایشیا اچ معاشرتی تحفظ دے ردعمل دا جائزہ ڳھنݨ کیتے تھیوݨ آلی ہک تحقیق اچ ایشیا بحرالکاہل دے ملکاں اچ معاشرتی تحفظ دے اقدامات دا ہک وسیع منظر پیش کیتا گئے اتے ایں دے جائزے تے روشنی پاتی گئی۔ کورونا بحران دے جواب اچ پاکستان احساس ایمرجنسی کیش سماجی تحفظ کیتے ساریاں توں ودھ اقدامات کیتن ۔ وزیراعظم دی معاون خصوصی سماجی تحفظ تے تخفیف غربت ڈاکٹر ثانیہ نشتر جیڑھی جو احساس ایمرجنسی کیش پروگرام دی نگرانی کریندی پئن، احساس دی چھت تلے شروع کیتی گئی ساری سکیماں اچ شفافیت کوں یقینی بݨاوݨ دا عزم کیتے۔ چک 40 ج ب ستیانہ دے رہݨ آلے محمد شریف دی بیوہ شوگراں بی بی جو مالی امداد وصول کرݨ کیتے بے نظیر انکم سپورٹ پروگرام دے دفتر واقعہ ستیانہ روڈ آئی، اے پی پی کوں ݙسایا جو او معذوری دے نال ست دھیاں کوں اتے ݙو پوتراں دی ݙیکھ بھال کریندی پئی اے۔ انہاں نقد امداد تے اطمینان کیتا اتے وزیراعظم عمران خان دی تعریف کیتی جو او لاک ڈائون وچال ساریاں توں ودھ متاثر تھیوݨ آلی غریب عوام دی ݙیکھ بھال کیتے اقدامات کریندے پئن۔ انہاں ݙسیا جو بائیو میٹرک تصدیق توں بعد بلا تاخیر انہاں اپݨی رقم وصول کیتی۔ انہاں ادائیگی مرکز دے عملہ دے تعاون دی وی تعریف کیتی اے۔ ہک بئے شہری یعقوب خان جیڑھا جو نشتر کالونی لاہور دا واسی اے، نشتر ٹائون اچ احساس کفالت سینٹر اچ موجود سہولتاں کوں قابل ذکر آکھیے۔ انہاں آکھیا جو پیوݨ دا صاف پاݨی، بہوݨ، انتظار کرݨ اتے شیلٹرز سودھے خصوصی انتظامات کیتے گئن۔ انہاں ݙسیا جو مرکز اچ آوݨ آلے لوکاں دی سہولت کیتے سیکورٹی کوں یقینی بݨایا گئے۔ وائرس کوں کھنڈݨ توں روکݨ کیتے ضلعی انتظامیہ ولوں ایس او پیز تےوی سختی نال عمل تھیندا پئے، انہاں ݙسیا جو لوکاں کیتے ایس ایم ایس الرٹ دا نظام ہک چنگا قدم اے جیندے نال درخواست گزار کوں اوندی اہلیت اتے رقم دی ادائیگی بارے ݙسیا ویندے۔ وفاقی دارالحکومت اچ ٹیکسی ڈرائیور اکرم شاہ آکھیے جو لاک ڈاﺅن وچال او آمدݨ توں محروم ہا کیوں جو لوکاں دی تعداد اچ تیزی نال ڳھٹ تھی گئی ہئی۔ اے پہلی وار نئیں تھیا جو ایں سانگے گھر دا کرایہ ݙیوݨ کیتے رقم کائنا ہئی۔ انہاں آکھیا جو سڑک کنارے کسٹمرز دا انتظار کریندے ہوئیں میکوں احساس پروگرام ولوں رقم وصول تھیوݨ دا ہک سنیہا ملے جیڑھا جومیݙے کیتے کہیں معجزہ توں گھٹ نہ ہئی۔ کجھ لوکاں مہانگ دے ایں دور اچ 12 ہزار روپے دی رقم تے سوال چاتے لیکن میݙے کیتے اے کہیں نعمت توں گھٹ کائنی۔ لاہورتوں ݙیہاڑی تے کم کرݨ آلے ہک بندے حاجی مشتاق اوکھے حالات اچ پاکستان تحریک انصاف (پی ٹی آئی) حکومت ولوں مستحق اتے غریب طبقے دی ݙیکھ بھال دی کوششاں کوں سراہے۔ انہاں ݙسایا جو میکوں کورونا وائرس دی وبا وچال 12 ہزار روپے دی مالی امداد ایں ویلھے موصول تھئی جئیں ویلھے میڈے ݙے کوئی کم نہ ہا۔ انہاں آکھیا جو احساس ولوں نقد رقم ملݨ اوکھے ویلھے اچ میݙے ٹٻر کیتے کہیں نعمت توں ڳھٹ کائنا ہئی ۔ کینٹ دے علاقے اچ احساس کفالت سینٹر اچ اپݨے تجربہ بارے ݙسیندیں ہوئیں انہاں ݙسیا جو ادائیگی مرکز اچ ضلعی حکومت دے تربیت یافتہ اتے معاون سٹاف ولوں موثر خدمات ݙتیاں گین۔ انہاں آکھیا جو غریب لوکاں دی مالی اوکھ تے قابو پاوݨ کیتے ایجھے اقدامات جاری رہݨے چاہیدن۔ اسلام آباد چیمبر آف کامرس اینڈ انڈسٹری دے ایگزیکٹو ممبر بابر چوہدری وزیراعظم عمران خان دی قیادت اچ حکومت ولوں شروع کیتے گئے احساس پروگرام کوں غربت دی لکیر توں تلے زندگی گزارݨ آلے لوکاں کوں ریلیف ݙیوݨ کیتے ہک وݙا کم قرار ݙیتے۔ انہاں آکھیا جو ایں پروگرام غربت توں ݙوچار مزدوراں کوں کورونا وائرس وچال لاک ڈائون صورتحال اچ مدد ݙے تے عارضی ریلیف ݙتے جئیں نال انہاں کوں اپݨی لوڑھ پوری کرݨ دے قابل بݨایا۔ ایݨ قسم دے بئے پروگرام شروع کرݨ دی لوڑھ تے زور ݙیندے ہوئیں انہاں آکھیے جو غریب لوکاں کیتے وزیراعظم دے اقدامات اچ انہاں دا ساتھ ݙیوݨا چاہیدے۔ 6 نومبر تئیں احساس ایمرجنسی کیش پروگرام دے تحت تقسیم اتے وصول کیتی گئی رقوم دی تفصیلات اے ہن۔ پنجاب اچ بینک کوں 92459.628 ملین روپے دی رقم جاری کیتی گئی اتے 79999.338 ملین روپے کڈھائے گئے۔ سندھ اچ بینک کوں 60532.548 ملین روپے جاری کیتے گئے جیندے اچوں 55305.1245 ملین روپے کڈھائے گئے۔ خیبر پختونخوا بینک کوں 34914.384 ملین روپے جاری کیتے گئے جنہاں اچوں 30390.04325 ملین روپے کڈھائے گئن۔ آزاد جموں تے کشمیر اچ بینک کوں 9593.364 ملین روپے جاری کیتے گئن جنہاں اچوں 2826.825 روپے کڈھائے گئن۔ اسلام آباد اچ بینک کوں 925.488 ملین روپے جاری کیتے گئے جیندے اچوں 833.8525 ملین روپے دی رقم کڈھائی گئی اتے گلگت بلتستان بینک کوں 1494.396 ملین روپے جاری کیتے گئے اتے 1346.74975 ملین روپے کڈھائے گئے۔ احساس ایمرجنسی کیش پروگرام توں فائدہ چاوݨ آلے لوکاں دی صوبائی صورتحال کڄھ اینویں ھے۔ 6 نومبر تئیں پنجاب اچ تقریباً 7704969 مستحق بندیاں کوں پروگرام اچ شامل کیتا گیا جئیں اچوں 6617079 لوکاں رقم حاصل کیتی۔ سندھ اچ 5044379 لوکاں کوں پروگرام اچ شامل کیتا گئے جئیں اچوں 4589662 لوکاں رقم وصول کیتی اے۔ خیبر پختونخوا اچ 2909532 لوکاں کوں پروگرام اچ شامل کیتا گیا جنہاں اچوں2506424 لوکاں رقم وصول کیتی۔ اینویں ای بلوچستان توں 799447 لوکاں کوں پروگرام اچ رلایا گیا جنہاں اچوں 701419 لوکاں نقد رقوم وصول کیتی۔ آزاد جموں تے کشمیر توں 272608 لوک پروگرام اچ شامل تھئے جنہاں اچوں 231757 لوکاں رقم وصول کیتی۔ گلگت بلتستان توں 124533 لوک پروگرام اچ شامل تھئے اتے 110472 لوکاں رقم حاصل کیتی۔ اسلام آباد توں 79374 لوک پروگرام اچ شامل تھئے اتے69081 لوکاں رقم وصول کیتی۔ احساس دے تحت جاری پروگراماں اچ احساس ایمرجنسی کیش، احساس انڈر گریجویٹ سکالر شپ، احساس پناہ گاہ (شیلٹر) اتے لنگر سکیم، احساس کفالت، احساس انٹرسٹ فری لون، احساس آمدݨ اتے احساس نشوونما پروگرام شامل ہن۔ انہاں پروگراماں نال لکھاں لوکاں کوں فائدہ ݙیوݨ سانگے ارباں روپے تقسیم کیتے گئن۔