پاکستان دا فائدہ قانون دی بالادستی کوں یقینی بݨاوݨ اچ اے،طاقتور اتے کمزور سانگے ہک جیہا قانون ہووݨا چاہیدے،وزیراعظم عمران خان

اسلام آباد۔1نومبر (اے پی پی)وزیراعظم عمران خان آکھیا جو پاکستان دا فائدہ قانون دی بالادستی کوں یقینی بݨاوݨ اچ اے،طاقتور اتے کمزور سانگے ہک جیہا قانون ہووݨا چاہیدے۔عمران خان کݙاہیں وی انہاں ڈاکواں کوں معاف کائنا کریسی،اللہ دا شکر اے جو اگر اے لوک آرمی چیف اتے آئی ایس آئی دے چیف دے خلاف ڳالھی کریندے پئن تا انہاں کوں منتخب کرݨ دا فیصلہ بلکل ٹھیک ہئی۔ڈاکوآں دے خلاف الیندے پئن تاں ایندا مطلب اے جو او بلکل ٹھیک لوک ہن،آوݨ آلے ݙینھ اچ ݙیکھسوں جو کیندی ڄھنگاں کمبدین اتے کئیں دے متھے تے پسینہ امدے۔اساݙی سکیورٹی فورسز گزیل پندرہ سالیں اچ دہشت گردی دا کامیابی اتے جرات نال مقابلہ کیتے اتے ملک کوں محفوظ ٻݨائے۔ایں پاروں ملک دا او حال کائنی تھیا جیڑھا باقی مسلمان ملکان دا تھیے۔اساݙی انٹیلی جنس انتشار پاوݨ دی بھارتی کوششاں اتے منصوبیاں کوں پاش پاش کر ݙتے۔اتوار کوں گلگت اچ گلگت بلتستان دی آزادی پریڈ نال خطاب کریدیں ہوئیں وزیراعظم آکھیا جو او قوم کوں ݙساوݨ چاہندن جو ہک مضبوط فوج پاکستان سانگے کتنی ضروری اے،لیبیا توں گھن کراہیں،صومالیہ، یمن اتےافغانستان اچ تباہی مچی ہوئی اے،انہاں ملکاں اچ جنگاں تھی چکین یا تھیندیاں پئن۔انہاں ملکاں دی عوام اوکھے حالات اچ ہن ۔وزیراعظم آکھیا جو کوئی ہفتہ ایجھا نی ویندا جئیں اچ اساݙی سکیورٹی فورسز دے نینگر آپݨی جاناں دی قربانی نہ ݙیندے پئے ہوون۔اساں آپݨی سکیورٹی فورسز کوں داد ݙیندوں۔وزیراعظم آکھیا جو ساکوں پتہ اے جو مودی حکومت پاکستان اچ دہشت گردی دی شکل اچ نی جݙانجو عالماں کوں قتل کر تے شیعہ سنی فسادات پاوݨ دی کوششاں کریندی پئی اے۔کلبھوشن یادیو ݙسیا ہئی جو کینویں بھارت بلوچستان اتے کراچی اچ دہشت گردی اتے انتشار پاوݨ دی کوشش کریندا رہیے۔وزیراعظم آکھیا جو اپوزیشن دی پوری کوشش اے جو میکوں بلیک میل کرے اتے میں انہاں کوں این آر او ݙے ݙیواں۔وزیراعظم آکھیا جو پاکستان دا فائدہ قانون دی بالادستی کوں یقینی بݨاوݨ اچ اے،طاقتور اتے کمزور سانگے ہک جیہا قانون ہووݨا چاہیدے۔وزیراعظم آکھیا جو انہاں لوکاں دا فائدہ پاکستان دے فائدے دے خلاف اے۔اے ثابت وی تھیے،اے سارے کٹھے تھی ڳئن،اتے بلیک میلنگ دی کوشش کریندے پئن،انہاں معیشت تے میکوں بلیک میلنگ کرݨ دی کوشش کیتین۔ اللہ دا شکر اے جو جیڑھی معیشت کوں اے دیوالیہ تھیوݨ دے نیڑے چھوڑ ڳے ہن او سدھے پاسے ٹر پئی اے۔وزیراعظم آکھیا جو میں گلگت بلتستان دی عوام کوں آزادی دے ݙینھ دی مبارک ݙینداں۔وزیراعظم آکھیا جو او گلگت بلتستان دی عوام کوں عبوری صوبائی حیثیت ملݨ تے وی مبارک باد ݙیوݨ چاہندن۔اساں اے فیصلہ اقوام متحدہ دی سلامتی کونسل دی قرارداد کوں ݙیکھدیں ہوئیں کیتے۔