اسلام آباد۔7نومبر (اے پی پی) وزیر اعظم عمران خان دا حافظ اآباد پڄݨ تے پرتپاک استقبال کیتا ڳیا۔ ہفتے کوں وزیراعظم دورہ حافظ آباد دے موقع تے یونیورسٹی آف حافظ آباد اتے ڈسٹرکٹ ہیڈ کوارٹر ہسپتال دے منصوبیں دا منڈھ ٻدھیا ۔ترقیاتی منصوبیں دے سنگ بنیاد دی تقریب دے موقع تےعوامی جلسہ دا وی انعقاد کیتا ڳیا جیں اچ عوام دے دی ودھ ساری تعداد شرکت کیتی ۔ جلسہ گاہ پڄݨ تے وزیر اعظم عمران خان دا پرتپاک استقبال کیتا ڳیا۔جلسہ اچ وزیر اعلی پنجاب سردار عثما ن بزدار دے علاوہ وزراتے ارکان پارلیمان وی شرکت کیتی ۔ وزیر اعظم ڄݙاں جلسہ گاہ پڄے تاں عوام داجوش و جذبہ عروج تے ہئی ۔ عوام بینرز چا رکھیے ہن جیں تے وزیراعظم عمران خان دیاں تصویراں ہن ۔ جلسہ گا ہ پڄݨ تے وزیراعظم عمران خان عوام دی محبت اتے جوش و جذبہ دا بھر پور انداز اچ جواب ݙتا ۔وزیر اعظم عمران خان جلسہ توں خطاب کریندے ہوئیں پرتپاک استقبال تے شکریہ ادا کیتا۔ ہفتے کوں اپݨے دورہ حافظ آباد دے موقع تے کامیاب جلسہ دے انعقاد تے رکن قومی اسمبلی شوکت علی بھٹی اتے پی ٹی آئی دی مقامی قیادت کوں مبارخ ݙتی ۔ حافظ آباد یونیورسٹی اتے ڈسٹرکٹ ہسپتال دی وختی تعمیر دا اعلان کریندے ہوئیں وزیر اعظم آکھیا جو تساݙا حق اے اتے اساݙا فرض اے ۔انہاں آکھیے میکوں خوشی اے جو پنجاب حکومت اڄوکے سال 2020 دے چھیکڑ تئیں پنجاب دے 50 فیصد عوام کوں صحت انصاف کارڈ ݙیوݨ دا فیصلہ کیتے ۔ وزیر اعظم آکھیا جو 2021 تئیں پورے پنجاب کوں صحت انصاف کارڈ ݙیسوں ۔ وزیر اعظم عمران خان ہیلتھ کارڈ تے روشنی پیندے ہوئیں آکھیے جو بیماری دی صورت اچ ہک خاندان 10 لکھ روپے تئیں دا علاج کتھاؤں دی کروا سڳسے ، بھاویں سرکاری ہسپتال ہووے یا نجی۔انہاں آکھیے جو پاکستان دی 73 سالہ تاریخ اچ پہلی واری ہک عام بندہ مطمئن اے جو بیماری ویھلے علاج دی سہولت حاصل ہو سی۔ انہاں آکھیے جو پوری دنیا امیر ترین ملکاں اچ وی ایں طرح دیاں سہولتاں دستیاب کائنی ۔انہاں آکھیے جو ہیلتھ کارڈ توں دیہاتی علاقیں اچ وی نجی ہسپتال بݨسن تے خیبر پختونخوا اتے پنجاب اچ پرائیویٹ ہسپتالاں دا ڄال وچھ ویسی۔ وزیر اعظم عمران خان اپݨے خطاب اچ پناہ گاہواں دے قیام، نواں پاکستان ہاوسنگ پراجیکٹ اتے ملک اچ احتساب دے نظام اتے افادیت تے روشنی پاتی۔
وزیر اعظم عمران خان دا حافظ آباد اچ جلسہ توں خطاب
مضمون کا ماخذ : اولمپس کے خدا
متعلقہ مضامین
