اسلام آباد۔6فروری (اے پی پی):وفاقی وزیرخزانہ ڈاکٹرعبدالحفیظ شیخ آکھیے جو مہنگائی دامسئلہ حل کرݨ وزیراعظم عمران خان دی اولین ترجیح اے، ماضی دیاں غلط پالیسیاں کوں درست کرݨ کیتے اقدامات توں عارضی مہنگائی دی صورتحال اے، اساݙا محورپاکستان دی عوام اے،موجودہ حکومت دا قرضہ صرف ہک ہزار ارب روپے ھے، پاکستان تے آئی ایم ایف پروگرام کوں ول ٹریک تے گھن آوݨ نال اتفاق کیتے ، آندے کجھ ہفتے اچ ایں حوالے نال اہم پیش رفت متوقع اے۔اپݨے ھک انٹرویو اچ ڈاکٹرعبدالحفیظ شیخ آکھیے جو حکومت مجموعی قومی پیداواراتے معیشت اچ بڑھوتری دا فیدہ عوام کوں پڄاوݨ تے توجہ کررکھی اے ۔ اساݙا محورپاکستان دی عوام اے ۔حکومت سماجی تحفظ دے بجٹ اچ گزریل حکومت دے مقابلے اچ ݙوگنازیادہ اضافہ کیتا ، اینویں عوام کوں سہولتاں تے ریلیف پڄاوݨ کیتے مختلف سبسڈیزداحجم ہک ہزار ارب روپے توں ودھ اے ، کوشش اے جو سبسڈیزعوام تئیں پڄے ۔سابق قبائلی علاقیں کیتے 152 ارب روپے رکھیے ڳئن۔سالانہ ترقیاتی پروگرام اچ پسماندہ علاقیں کیتے ودھ رقم مختص کیتی ڳئی۔انہاں آکھیے جو گزریل حکومت جاݨ ٻجھ تے رڈالرکوں سستارکھݨ دی تباہ کن پالیسی اپنائی جیں دی وجہ توں پوراملک باہر دیاں چیزاں گھنݨ دا عادی تھی ڳیا ،درآمدات ودھ ڳئے اتے سابق حکومت دے پنچ سالاں اچ برآمدات اچ کوئی اضافہ نی تھیا ،موجودہ حکومت جڈاں آئی تاں اساکوں زرمبادلہ دے ذخائردامسئلہ درپیش ہئی ،حکومت برآمدات دے فروغ تے توجہ ݙتی تاں جو اساں ودھ توں ودھ ڈالر کما سڳوں ۔ انہاں آکھیے جو مہانگ دا مسئلہ حل کرݨ وزیراعظم دی اولین ترجیح اے، ماضی دیاں غلط پالیسیاں کوں درست کرݨ کیتے اقدامات توں عارضی مہنگائی دی صورتحال اے، اڄوکے سال چالیھ لکھ کݨک امپورٹ کیتی ویندی پئی اے ،8 لکھ ٹن چینی درآمد کیتی ویندی پئی اے ، اینویں پاکستان دالاں تے خوردنی تیل وی درآمد کریندا پئے ۔
